Það vorar hvort sem mönnum líkar betur eða verr.

 

Nú er sá tími sem er hvorki né, hvorki algert skammdegi, né beinlínis Vor í lofti.

Ögn bjartara þegar venjulegum vinnudegi lýkur, fyrr bjart útivið.

Pólitíkin er jafn furðuleg og lengi hefur verið, spinndoktorar spinna og snældur þeirra humma.

Nú er mikið notast við fréttir af einhverju sem ekki er enn orðið.  Fall Krónunnar, frost á fasteignamarkaðinum, gjaldþroti tiltekinna fyrirtækja og allskonar dagslát önnur.

Ef að sé og ef að mundi

átta skott á einum hundi??

Spinnararnir vilja spinna mönnum úr og í embætti, virðingastöðum og svo grípur ljósvakinn þetta allt og tekin eru viðtöl við allskonar ,,fræðinga" sem hafa hitt og þetta ,,á hreinu" ----í það minnsta ef tekið er mið af því, hversu oft er talað við viðkomandi. 

Jú hitt og þetta bendir nú til,,altso, sjáðu til, EF þetta gerist og hann fer ekki að ráðum MÍNUM um lúkningu málsins, ÞÁ....................

Og svo verður talað við annan ,,Sérfræðing" á morgun eða bara eftir hádegi, það er svo ofsalega mikið að gerast,  ----,,í þessum töluðu orðum".

Svo er boðað til Blaðamannafundar og blaðamenn beðnir að yfirgefa væðið, Áður en fundarefnið er mætt og fljótlega eftir að hópurinn var nærri allur farinn í burtu.

Þetta eru ,,menntaðir menn í Stjórnmálafræðum" og ,,Fjölmiðlafræðum"  sér eru nú hver ,,vísindin" á þeim bæjunum.

Þeir ætla að hækka áburðinn mjög mikið og fara þannig gegn Vorinu.

Þetta þýðir að við verðum að bera skarna á tún okkar og harka af okkur lyktina.

Þarf endilega að vera skítalykt af stjórnmálum?

Við höfum verið best í heimi svo lengi, að Þorskurinn er bara að verða útdauður og einungis hræætur á borð við Ýsu lifa af á miðunum okkar, hver við höfum ,,varðveitt" og stundað umsjón og ábyrgðarfulla umsýslu með ,,sjálfbærum " miðum okkar.  --betur en nokkur önnur þjóð í heimi og Hannes talar sig eldrauðan í framan um efnið á erlendri grund.  --Líklega vegna þess, að ef hann færi nú að básúna þessi fræði sín og trúboð, hérlendis, hitti hann líklega fyrir einn og einn sjómann, sem hefði verið á umræddum miðum hér áður og fyrrmeir, þegar ,,kerfið" var ekki til.

 

Guð sér um, að líklega dagar að nýju og fuglarnir fái sitt--- en Spinndoktorarnir munu þagna, líkt og svo margt annað sem við mennirnir erum uppteknir við, þá og þa´stundina.

Ég hlakka Vorsins, þegar ég fæ aftur tækifæri til, að ergja mig yfir mýflugunum sem ætla aldrei að láta mig í friði.

 

Guðslaun

Miðbæjaríhaldið