Viðurkenning skipbrots Kvótakerfis.

 

Nú liggur það ljóst fyrir, viðurkennt og undirskrifað, að núverandi Kvótakerfi hefur ekki náð tilætluðum árangri í nokkru því, sem skiptir máli fyrir framvindu auðlindarinnar í sjónum.

 Ekki hefur náðst neinn árangur við ætlað uppbyggingarstarf á stofnunum við landið, ekki hefur náðst að heldur, neinn árangur í að tryggja byggð og viðgang byggða sem búa einna helst að sjávarnytjum.

Ónýtt kerfi sem hvergi nær árangri ætti að henda á hauga sögunnar og snúa sér að mótun annars kerfis, sem ætla mætti að næði utanum þyrrum sett markmið um hagsæld og framvindu.

Nú er komið allt það fram, sem við andstæðingar Kvótasetningar botnfiskafla og veiðistýringakerfis, sem á því byggðist.

Kalt verður við kórbak, nú næsta Þorra.  Þá mun Mörsugur vera búinn að sjúga úr mönnum allan mör og útgerðir far að safnast til uppboða, sakir ófeitis.  Lítið mun upp í kröfur fást, þar sem öngvir verða til, að bjóða á móti peningastofnunum, nema ef vera kynni stórútgerðin, sem vomir nú yfir máttminni útgerðunum og hlusta vel eftir hryglunni, sem mun koma úr börkum forráðamanna þeirra minni útgerða, sem eru jafnvel skuldsett.

Af hverju kemur sagan Ven die Haifiche menchen veren, hvar líkingamáli var beitt á háfiskana (Hákarlana) sem myndu sannfæra litlu fiskana um, að synda uppí kjafta sína, væru Háfarnir menn.

Svo eru það svokallaðir ,,Mótvægisaðgerðir"  mann setur hljóðan.  Bættar samgöngur,--með því að rjúfa enn frekar þann frið sem skapa átti milli Landsbyggðar og Höfuðborgarsvæðis, með lagningu Sundabrautar, verður slegin af og vegabætur úti á landi látnar í forgang,--enn og aftur, skítt að ekki finnast fleiri galin göng á borð við Héðinsfjarðargöng, því þá hefðu menn auðvitað sett þau í forgrunn.  Ætli menn fari ekki að röfla nú um Vaðlaheiðagöng, eins og þau komi utgerðabæum fyrir vestan og austan eitthvað til góða.

Síðan er auðvitað sífrað um stóraukna sókn í túrisma, hver er LÁGLAUNAATVINNUGREIN.  Semsagt, gulltryggja á, að Landsbyggðin og þá sérílagi Vestfirðir verði fest sem ALGERT LÁGLAUNASVÆÐI HVAR ALLIR VERÐI JAFNIR Í ÖRBIRGÐ.

Hláleg viðbrögð og fyrirsjáanleg.

Öngvir græða á þessu til lengdar, nema stórútgerðin og svo bankarnir.

Tóku menn eftir því, að K(G)B banki,--hmmm,- afsakið, Kaupþing, stórhækkuðu vexti á verðtryggum lánum hjá sér?  Hví skyldu þeir þurfa að gera það, banki sem býr við algert góðæri og met hagnað?  Gæti verið, að ,,Heimamarkaðurinn" þurfi að greiða fyrir stórgróðann?

Nei þetta lið kemur óorði á frjálsan markað, líkt og rónarnir á blessað Brennivínið.

Fer að endurskoða stuðning við Flokkinn, ef menn þar á bæ fara nú ekki að lesa aftur hinar gömlu og haldgóðu stefnuskrár okkar, hvar frelsi eins mátti ekki verða helsi neins.

Miðbæjaríhaldið

 

Gerast leikföng stórkarlaleg.

Sá í Fréttablaðinu, umfjöllun um þyrluflugsæfingar forstjóra Samvinnufélags nokkurs eða fyrrum slíks, sem er að dunda sér við þyrluflug.  Þeir sem einna helst verða fyrir barðinu á æfingum hans á þessu nýja þarfaþingi sínu, eru nágrannar hans, sem mér skilst, að eru náskyldir ættingjar eiginkonu hans.

Núna um síðustu helgi, var þessi hluti ættboga konu hans, að halda uppá fermingu, að vísu síðbúin veisla en veisla samt og þar á bæ tóku menn það til bragðs, að skella svona nokkurskonar ættamóti upp, vel til fundið, þar sem veður var dásamlegt og neyttu þau færis og héldu teitið í tjaldi nokkuð miklu.   

Þar inni heyrðist ekki mannsins mál, þar sem Ólafur hinn digri forstjóri, tók þyrlu sína til kostanna og æfði stíft hoover og hallandi flug.  Samkvæmt viðtali við hann, segir hann þessa nágranna sína og hann elda silfur grátt saman í dómsölum.  Að því tilefni, kíkti ég á netið og fann, að hann hafi farið nokkuð halloka í þeim salarkynnum og því vill hann auðvitað hefna þess í héraði sem illa fór á Alþingi, sem var háttur stórlyndra héraðshöfðingja, hér áður, þegar enn voru tilhneigingar stórbokka, að sýna á sér breiddina við almúgann.

Kona nokkur í þættinum í Bítið, Kolbrún Björnsdóttir, gerði þetta að umtalsefni í þætti sínum.  Hún flissaði eins og fermingarstelpa yfir því, hvað Ólafur væri flottur að eiga svona stóra þyrlu, nánast jafnstóra og Ríkissjóður á bágt með að kaupa.  Gerði grín að fólkinu, sem voru í fermingarveislunni og að einhverjir væru að kvarta yfir því, að flugið fældi búfé, bæði rolur (en á þessum tíma er viðkvæmt sambandið milli áar og lambs og undanvillingar eiga litla lífsvon, fælist þau undan ,,móður" sinni.) og hestar með krakka á baki.  Fannst þetta lið giska púkó og lítið spennandi nöldurseggir og öfundarmenn.

Vonandi hleypir enginn upp fermingarveislum, sem þessi góða kona á vonandi eftir að halda börnum sínum.

Svo lauk Ólafur viðtalinu með lýsandi hætti.  Hann spurði hvort hann þyrfti að hringja eitthvað í menn, til að lenda á Rvíkurflugvelli.  Gelgjulegt orðfæri, svo ekki sé meira sagt.  Talar eins og ofdekraður unglingur, sem ekki hefur enn lært að setja sig í spor annarra með tillitssemi.

Á hinn bóginn er virkilega gaman að því, að Samvinnufélögin haldi forstjóra sína svo vel, að þeir geti eignast svona þing sem þyrlur eru.  Það þýðir auðvitað, að hann er á mun betri launum en faðir hans sem var Kaupfélagsstjóri í Borgarnesi. 

Segið svo, að ekki séu framfarir á landi voru.

 

Miðbæjaríhaldið

Eru menn nokkuð að grínast?

Samkvæmt fréttum er eitt flugfélag, að fara fram á lóð undir flugstöð við Rvíkurflugvöll. 

Er völlurinn ekki á förum?

 

Ætlast men til þess, að borgarbúar haldi áfram að greiða allan þann herkostnað, sem lega hans í Vatnsmýrinni kostar borgarbúa?

 

Eru menn virkilega að ganga af göflunum?  Ætla menn að setja í bið það háskólasvæði, sem gæti þarna risið? 

 

Ætla menn virkilega að kma í veg fyrir samkeppnisgetu Íslands við útlönd þar sem Háskólahverfi er einn mikilsverðasti grunnur til að veita viðnám til að halda unga fólkinu hérlendis.

 Svo er annar flötur á þessu.  Samkeppni í innanlandsfluginu kvað hafa sett felög á hausinn hvert af öðru og Flugfélag Íslands hefur vælt út bæði óbeinan stuðning sem hreina styrki vegna lélegrar afkomu í innanlandsfluginu.

 Svo er annað, Ríkið greiðir niður rekstur þess félags sem er nú nánast einrátt í innanlandsfluginu, það þýðir auðvitað, að við erum að greiða niður fargjöld túrista.  Gersamlega óþolandi með öllu.

 

Miðbæjaríhaldið

,,Frétt" á stöð tvö eða umfjöllun.

Hlustaði á síðdegisútvarpið á Stöð 2 í gær.  Stjórnendurnir tóku fyrir hækkun á pallaefni hjá Húsasmiðjunni og raunar undirliggjandi líka hjá Byko.  Talað við framkvæmdastjórann og hafði hann skýringar á reiðum höndum, of mildir vetur í Rússíá og því ekki hægt að flytja bolina úr skógum þeirra, þar af leiddi stórfelld hækkun á hrávöru í timbri.  Tók fram, að harðviður hefði ekki hækkað eins mikið.

Allt hljómaði þetta líklega hjá honum.  Þar sem ég hef ekki samanburð frá útlendum kaupmönnum í timbri, gat ég tæplega farið að efast um sannleiksgildi frómrar frásagnar forstjórans eða var þetta framkvæmdastjórinn, -ekki viss. 

Við hjónin töluðum um þessa vá sem að okkur steðjaði vegna hlýnun ar loftslags á jörðinni, fátækir bændur sem áður þurftu að kljást við Sovétið, þurfa nú að berjast í illafrosnum jarðvegi og veðst þar að líkum allt upp í drullu og ófæru.  Bolirnir fínu, rotna og fúna næsta sum ar og frjósa svo auðvitað fastir í haust öngum til nota, nema skógardýrunum til skjóls.

Allt í einu laust niður í kollinum spurningu, sem ég gat auðvitað ekki fram borið, þarna í undirstöðum verðandi Sumarbústaðar.  HVERNIG MÁ ÞAÐ VERA, AÐ TIMBURHÚSGÖGN ÚR FURUR OG ÖÐRU HRÁVIÐI, Í IKEA HAFI EKKI HÆKKAÐ TIL JAFNS VIÐ PALLATIMBUR HÚSKÓ???????????????

 Töluðum drykklanga stund um þetta við hjónin en höfðum ekki svörin á reiðum höndum, frekar en endranær í aðskiljanlegum ástæðum hækkana hérlendis, þegar sambærilegar vörur, svo sem sláttuvélar og litlir traktorar, lækka í USA.

Jumm og já, það kvað erfitt að reka business á Íslandi, að ekki sé talað um byggingavörubransann, hvar allt er á uppleið í verði, bæði tilbúið, lóðir og hvaðeina.

Miðbæjaríhaldið

Hvað getum við gert til varnar ungmennum okkar?

Var að lesa Mogga og á miðopnu var birt kveðja föður til dóttur sinnar látinnar, sundurtættur af sorg og auðvitað sjálfsásökun,--þó svo við vitum svo vel, að er óverðskulduð.

Mann setur hljóðan, þar sem maður þekkir úr vingarði sínum, sögur sem eru viðlíka skelfilegar.

Fluggreindar stúlkur og með allt sem hugsast getur í sínu liði.  Urður , Verðandi og Skuld heimsóttu og gáfu, gjafirnar stórar og miklar.  En munum að telja daga okkar, því öllum er markaður tími.

 Fyrst ber að þakkar Ritstjórum Moggans fyrir að veita rými á miðopnu fyrir þessar kveðjur foreldra til ástkærrar dóttur sinnar, sem féll fyrir ,,hendi" óprúttinna sölumanna dauðans. 

Annað sem kemur svo upp í huga lesenda er, hve skelfilega mikill skaði unninn er á framtíða lands og þjóðar með innflutningi og sölu eiturlyfja.  Við búum á eyju, sem ætti að vera betur varin gegn þessari vá en þau lönd, sem eiga löng landamæri að nágrönnum sínum. 

Sá kvikmynd af fíkniefnaleitarhundi sem nefndur var Púki.  Það var stórundarlegt, hve naskur hann var, að finna efnin í vel vörðum felustöðum, jafnvel niðursuðudósum.  Þá sannfærðist ég um, að við ættum að kaupa og þjálfa her slíkra hunda (þýskra fjárhunda), til að annast okkar eftirlit á flugvöllum og höfnum landsins.  Það varð nú minna um það en til stóð og því heldur flóðið áfram.

Mér er sagt, að flugför, sem koma til landsins frá útlöndum, verði að lenda á flugvöllum, sem eru með vakt Tollvarða, hverjir eiga að leita að ólöglegum innflutningi.  Svo kvað vera í gildi sparnaðarráðstafanir hjá Tollinum og Rvíkurvöllur ku að hluta undanþeginn þessum reglum og bæði ferjuflugvélar og einkavélar komi þangað án þess, að tollverðir séu ætíð til staðar og tollskoðun því stopulli en ætti að vera.  Ekki svo að skilja, að þaðan komi eitthvað magn slíkra efna, heldur bendi ég á gloppur og þannig virðingu fyrir settum reglum, jafnvel hjá þeim, sem ber að senda samgöngutækin á viðeigandi hafnir (flug eða venjulegar).

Einnig er sagt, að fíkniefnaeftirlit við hafnir landsins séu í skötulíki og gámar fari í gegn, nánast óskoðaðir.  Svo er ferja frá Evrópu sem hingað kemur reglulega en eitthvað minna um fíkniefnahunda þar.

Ég er þess fullviss, að foreldrar á Íslandi greiddu glaðir nokkrar fjárhæðir til þess, að eftirlit mætti vera betra og þeir sem brjóta af sér, verði settir í varðhald og geymdir undi manna höndum, -- lengi lengi.

Þetta er hernaður gegn ungmennum okkar og hinni nýju Aldarmótakynslóð.  Sláum hvergi af kröfum um aukið eftirlit og að farið sé að þeim reglum um hingaðkomu skipa og loftfara.  Við eigum þa´vörn, að vera á eyju og nýta ber þá aðstöðu vel.

Sendi öllum þeim, sem sárt eiga að binda vegna fíkniefna og sölumanna dauðans.

Miðbæjaríhaldið

Til hamingj kæru kven-MENN en munið gengnar kynsystur.

Konur halda upp á 19. júní og er það vel.  Sá dagur er einmitt kjörinn til, að láta hugann reika aftur til þeirra kvenna, sem börðust gegn straumi þeirra hugmynda sem þá réðu ríkjum. 

Okkar konur höfðu þó eitt í vopnabúri sínu, sem kynsystur þeirra áttu ekki í öllum löndum álfunnar.  Formæður þeirra höfðu þá stöðu, að ekkert þótti við það athguandi, að þær réðu fyrir búum eða væru formenn á skipum þess tíma.  Mér fynst stundum, að þetta gleymist í umræðunni um kvenréttindi.  Í okkar menningu var það meitlað, að hver var dæmdur að verðleikum en ekki eftir því hvort um var að ræða karll eða kven menn, á alla var litið sem menn.

Nútímakonur leita miklu frekar að fyrirmyndum til útlanda, sérlega Svíþjóðar þegar jafnréttisumræðan er á baugi.  ÞEtta finst mér nánast  móðgun við formæður mínar fyrir vestan og víðar.  Þær létu ekkert eftir í sinni umsýslu um lausa aura eða fé annað.

 Hugheilar árnaðaróskir

 

Miðbæjaríhaldið

Ef ekki á að læra af reynslunni, hverju þá??

 Mig langar að setja hér inn, sem sjálfstætt blogg, svar sem ég lét í tilefni skrifa Stefáns Fr á Akureyri um kvótamál.

 

Minn kæri.  Það er nú svo, að menn er taldir skynsamir, ef - og aðeins ef, að þeir læra af reynslunni.

 

SVo ætti að vera með ráðamenn okkar.

 

Nú liggur morgunljóst fyrir, að helstu markmið þess kerfis, sem ranglega hefur verið nefnt Kvótakerfi (Hlutdeildarkerfi væri réttnefni, þar sem menn hafa ákveðinn hundraðshluta alls afla af miðum þjóðarinnarundir höndum, til nánast frjálsrar ráðstöfunar)  hefur gersamlega mistekist og hefur raunar aldrei verið nálægt þeim viðmiðum, sem sett voru við innleiðingu þess.

 

Ef ráðamenn geta talist horskir, ég tala nú ekki um, greindirværu þeri löngu búnir að henda þessu plaggi, sem hverju öðrum ónýtanlegum löfrum og komið sér upp einhverju, sem duga gæti til eflingar og aukins viðgangas nytjastofna og byggðarí kringum landið, eins og það hét í hinu orðfagra plaggi, um tilgang lagana, þá þau voru sett fyrir margt löngu.

 

Miðin eru stórskemmd, vistkerfi nytjastofna brjáluð af stórvirkum ,,vinnuvélum" (trollum) og hlutfall landaðs afla og drepinna fiska hvurgi lélgera á byggðu bóli.

 

Þetta fullyrði ég, þar sem flottrollin drepa stærsta hluta þess fiskjar, sem fara í gegnum það veiðarfæri, vegna hreisturskemmda.( þetta á við um síld, loðnu, þorsk og löngu, bæði blá og venjulega)

Að auki kvað enn kveða rammt að brottkasti og annarskonar tilfæringum .

Semsagt, væri ekki Gullglýjan, sem byrgði mönnum sýn og ágirndar flygsufjúkið, sem fennt hefur á sálarglugga stórútgerðarinnar, væri kerfið löngu löngu farið til föðurhúsana,- nefnilega Fjandans til, því seint vil ég halda því til streytu, að allir ráðamenn okkar hafi verið undirmálsmenn og heimskingjar.

 

Þetta er nú endur uppskrift af svarinu, þar sem mig brestu kunnáttu til, að afrita þessa klausu úr svarinu og yfir í stjórnborðið hjá mér og er það auðvitað til marks um tækniheftu þónokkra.

 

Miðbæjaríhaldið

 

 

Kvótavandræði

Nú er svo komið, að hver á fætur öðrum er að viðra þá hugsun sína, að kerfi sem ekki hefur náð neinum af markmiðum sínum, þurfi endurbóta við.

AF hverju endurbætur?  Af hverju ekki bara að gera við þetta kerfi, sem önnur, sem ekki hafa virkað, nefnilega HENDA því á hauga sögunnar?

Kerfi sem tekur ekkert mið af Lífkeðjunni, né virðir umhverfið, þó svo að það umhverfi sjáist ekki, er nefnilega undir yfirborði sjávar, er stórhættulegt framtíðinni.

Ekki er ég að leggja til, að við hættum veiðum á fiski, öðru nær.  Við getum hæglega búið til kerfi, sem tekur ekki náttúruna út fyrir sviga, heldur vinnur með vistkerfinu.

Veiðafæranotkun er lykilatriði í þessu sambandi og sést þá best á því, að þar sem togveiðar hafa verið stundaðar hvað ákafast, er nú viðkomubrestur í fuglastofninum, sakir skorts á síli. 

Hræætur eru þeir einu sem hafa það nokkuð gott og ætti það að hringja bjöllum hjá vistfræðingum.  Svipað var uppi á teningum við Kanada, rétt áður en botninn datt úr öllum veiðum hjá þeim.

Sammerkt er með okkar sókn og þeirra, að aðaluppistað sóknarinnar var með botnvörpum og svo kom þetta skelfilega veiðarfæri Flottrollið.

Við verðum að brjótast úr viðjum hugarfarsins, sem byggir á Kvóta.  Við verðum að byggja upp kerfi sem tekur á umhverfisþáttum í lífríki miða okkar en ekki bara hagræðingu í sókn og veiðum.

 

Með virðingu

Miðbæjaríhaldið

Hvurnig er þetta með Skuggahverfið?

Hér í eina tíð, þótti nú ekki par fínt, að búa í skuggahverfinu.  Sólar naut þar síður en sunnanmegin í Skólavörðuholtinu, enda bendir nafngiftin ,,Suðurhlíðar" til, að þar hafi verið notalegra.

Þetta er núna auðvitað löngu liði og eru menn að verðleggja íbúðir í turni nokkrum, afar góðum, á mjög margar milljónir.

Svo ku einnig verða með íbúðir, sem menn mega búa í, ef þeir leggja fram sem tryggingu, svona um það bil 40 millur.  Sá sjóður rýrnar eftir því sem árin líða og svo þarf að greiða fasteignagjöld og svoleiðis nokk af sömu íbúðum.  Ekki mega menn veðsetja íbúðirnar sínar, heldur er litið á þessa aura (um 40.000.000,00 kr) sem svona nokkurskonar pant.  viðkomandi ma´síðan búa þarna þar til öndin yfirgefur hann.  Mikil ljúfmenni standa að svona byggingum. 

Semsagt, akkúrat.  Mikið til af aurum hjá mörgu fólki og er það auðvitað vel en mér finnst nú einhvernvegin, að sumir séu að fífla suma.  Ég samgleðst þeim sem geta látið svona mikla peninga í íbúðir og umgjörð um sig.

Hinsvegar er mér nokkuð í nöp við þá sem taka til sín of háar upphæðir af framlegi ungmenna, sem eru að byggja sér íbúðir og þurfa að taka til þess lán.  Þessir aðilar geta, að því er virðist, lifað í vellystingum og bruðlað í hvaðeina en samt haldið vöxtum verulega ofar en gerist í viðmiðunarlöndum okkar í Evrópu.  Síðan eru það vaxtavextirnir, Verðtryggingin, og síðast en ekki síst, skelfilegur kostnaður, sem leggst á afborganir, sem fallið hafa niður af einhverjum völdum, lögfræðikostnaður.  Sá tollur virðist vera algerlega að sjálfdæmi þess sem á leggur.   Hef séð upphæðir sem fengju svona venjulega brauðstritara að svitna, bara fyrir að senda eitt lettersbréf, sem er staðlað í tölvukerfum löffana.

Hér verðum við að huga að, því ef brestur samstaða þjóðarinnar um séreign á íbúðarhúsnæði og að fólki, með venjulegar tekjur geti komið sér fyrir í svona venjulegum hýbýlum, ekkert of í lagt, heldur svona eðlilegar íbúðir, án verulegs íburðar,--erum við komin að hengiflugi, sem við vitum ekkert um, hvernig mönnum muni af reiða eftir fall þar niður.

 

Þetta var svona hugleiðingar í góða verðinu.

 

Miðbæjaríhaldið

Sumsé, útlendingar vilja leggja ,,gott eitt" til.

Hérlendis voru staddir menn á vegum Alþjóða gjaldeyris .....eitthvað.

Frómir menn, sem eru flestir nánast eins í útliti, nefnilega MIB.  Svona nútíma matrósarföt.

Þetta góða fólk, vildi okkur ekkert nema gott eitt.  Einkavæða eða breyta lítilli stofnun, sem hefur haft það meðal verkefna sinna, að lána fólki sem vill eiga heima einhverstaðar annarstaðar en á Rvíkursvæðinu eða í ,,kjarnabyggðalögunum", svo sem Akureyri og Suðurnesjunum.

Bráðnauðsynlegt, að hafa vit fyrir þessu fólki og lána þeim ekkert fyrir kofum sem enginn annar vill búa í.  Þetta eru sko ,,fagleg vinnubrögð"

Þessir sérlegu vinir okkar og vitringar, halda ekki vatni yfir árangrinum í fiskveiðistjórnun en sá góði árangur er nú að sliga hafnir landsmanna með fiskihrúgum, sem ekkert hefst undan að vinna, nema með hjálp annarra sérlegra vina okkar íslendinga, nefnilega aðfluttu vinnuafli.  Árangurinn er svo stórkostlegur, að bjargfugl drepst umvörpum úr,-líklega ofáti og flýtur um allan sjó.  Mávagerið raskar nætursvefni frístundabýlinga upp um allar sveitir og hrekur mófugla af þúfum, hvar orma er von.  Leggur gersamlega undir sig flögin, sem bændur tættu og herfuðu til sáningar.  Þetta eru auðvitað bara matvandir vargfugl, sem vill ekki allan þann sjóvarafla af Sandsíli og annarra síla, sem hið stórfenglega Kvótakerfi hefur framreitt í ofgnótt,-----allt að mati þessara tignu gesta Alþjóða gjald...eitthvað.

Svo benda þessir ljúflingar á, að íslenskt verkafólk og raunar margir aðrir hér á vinnumarkaðinum séu allt allt of kaupdýrir og ekki sé annað formandi en flytja inn meira fólk, sem kann að meta svona alþjóðleg launakjör.  Íslendingar eru svo sveitó og í rauninni bara púkó, að þeir fatta ekki, útrásir og aðrar rásir sem þurfa að hafa heimamarkað til að borga útirásir, þoturásir og allt hitt nammið.

EF ég fengi svona gesti í heimsókn á mitt heimili, þakkaði ég þeim kærlega fyrir komuna en segði svo, að heyra megi ég erkibiskups boðskap en ráðinn væri ég í, að hafa hann að engu nema spotti.

Miðbæjaríhaldið